O‘zbek fol'klor san'ati Ispaniyada taqdim etilmoqda

Mamlakatimiz elchixonasi ko‘magida «Zamin» fol'klor ansamblining joriy yil 25 iyun'- 2 iyul' kunlari Ispaniyaning Kalella shahrida o‘tkazilayotgan «Grand Calella Folk Festival» xalqaro fol'klor festivalida ishtiroki tashkil etildi.

Bugungi kunda davlatimiz rahbari tomonidan madaniyat va san'at sohasiga, xalqimizning boy madaniy merosiga berilayotgan e'tibor natijasida mamlakatimizda boshqa san'at turlari qatori fol'klor san'ati rivoji ham yangi pog‘onaga ko‘tarildi.

O‘zbek xalqining fol'klor san'ati qadim tarixga ega. Fol'klor boshqa ko‘pgina san'at turlari bilan uyg‘un holda shakllangan. Unda o‘zbek xalqining qadimiy urf-odatlari, milliyligi, boshqa xalqlar an'analariga o‘xshamaydigan o‘ziga xos jihatlar mujassam.

Hozirda o‘zbek fol'klor san'atini xalqimiz va butun dunyoda targ‘ib etuvchi fol'klor jamoalari bo‘y ko‘rsatmoqda. Jumladan, «Barkamol avlod» respublika bolalar maktabi fol'klor to‘garagi qoshida faoliyat ko‘rsatayotgan «Zamin» fol'klor ansambli yurtimizda va xorijda o‘tkazilayotgan xalqaro festivallarda mamlakatimiz madaniyatini faol targ‘ib etib kelmoqda.

«Grand Calella Folk Festival» festivalida dunyoning 15 dan ortiq mamlakatining fol'klor jamoalari ishtirok etayapti.

«Zamin» fol'klor ansambli o‘z chiqishlarida mamlakatimizning boy madaniyati va urf-odatlarini targ‘ib etmoqda. Milliy o‘zbek fol'klor qo‘shiqlari jahon san'ati ixlosmandlari tomonidan iliq kutib olinmoqda

Ma'lumot uchun, «Zamin» fol'klor ansambli shu kunga qadar Tailand, Turkiya va Indoneziya kabi qator davlatlarda o‘tkazilgan xalqaro festival' va tanlovlarda munosib ishtirok etgan.